Numri 'një' i integrimeve evropiane Teuta Arifi e cilëson si një qasje kreative dhe që duhet shfrytëzuar maksimalisht, kornizën e emrit që propozoi komisionari Fyle. Ndonëse nuk sqaroi se çfarë do të thotë zgjidhja e kontestit të emrit në fazën e hershme dhe nëse qeveria është e gatshme që t'i përgjigjet kësaj klauzole, Arifi tha se vendi duhet të ruaj konstruktivitetin për sa i përket kultivimit të marrëdhënieve të mira ndër-fqinjësore dhe bisedimeve rreth çështjes së emrit.
"Mendoj se ky është një moment shumë i rëndësishëm dhe duhet ta shfrytëzojmë frymën pozitive dhe para se gjithash përkrahjen që kemi nga partnerët e BE-së dhe të vazhdojmë me intensitetin e njëjtë të punojmë në reformat e axhendës evropiane por edhe në ndërtimin e raporteve të mira me të gjithë shtetet fqinjë. Mendoj se gjithashtu është shumë e rëndësishme që KE-ja përmes propozimit për negociata në një kornizë të tillë, në një mënyrë dëshiron të mundësojë impuls plotësues për vendin tonë dhe besoj se do ta ruajmë qasjen konstruktive në këto negociata, në këtë proces me qëllim që të gjejmë një zgjidhje të pranueshme", theksoi Teuta Arifi, zv/kryeministre për çështje evropiane.
Arifi tha se emri edhe më tej mbetet në kornizat e OKB-së, por se qasja e re e BE-së përkon me angazhimin e saj në procesin e zgjerimit të Unionit me vendet e Ballkanit Perëndimor. Zv/kryeministra për çështjet e euro-integrimit komentoi edhe Memorandumin për mirëkuptim të propozuar nga ministri i jashtëm grek Avramopulos, duke theksuar se ai duhet të shërbejë si një nxitje pozitive në zgjidhjen e çështjes së emrit.
"E kam parë dhe analizuar, me rëndësi është që të ketë një atmosferë pozitive dhe të gjithë duhet të angazhohen për sa i përket mbajtjes së një trendi pozitiv në rajonin e Ballkanit dhe vendet fqinje kanë një arsye më tepër për të përkrahur integrimin jo vetëm të Maqedonisë por edhe vendeve të tjera të rajonit në BE", deklaroi Teuta Arifi, zv/kryeministre për çështje evropiane.
Arifi e cilësoi raportin e sivjetmë të Komisioni Evropian, si mjaft pozitiv duke nënvizuar se qeveria ka përmbushur në nivel të kënaqshëm kriteret politike. Ndërkaq për sa u përket vërejtjeve të nënvizuara në raport, Arifi tha se do të adresohen në udhërrëfyesin e dytë të qeverisë. Semra Jakupi
