Maqedonia do të mbetet jashtë dyerve të NATO-s për aq kohë sa do të mbetet pezull çështja e emrit me Greqinë. Ministri i Mbrojtjes Talat Xhaferi nuk deshi të spekulonte afate, por tha se raundi i ri i bisedimeve mes autoriteteve maqedonase dhe greke në Nju Jork, paraqet angazhim të rëndësishëm në këtë drejtim. Me rastin e 64 vjetorit të themelimit të NATO-s, Xhaferi tha se Maqedonia ka përmbushur të gjitha kriteret për anëtarësim, dhe se Aleanca do të bëjë ftesë, në momentin e parë kur do të marrë fund edhe problemi dy dekadësh me Greqinë.
"Maqedonisë i mbetet një sfidë e vetme në rrugëtimin e saj për anëtarësimin e plotfuqishëm në NATO; tejkalimi i problemit tani më të njohur me Greqinë, gjë që në kohë të fundit është intensifikuar dhe shpresojmë që edhe këtë sfidë Maqedonia do ta tejkalojë...NATO nuk ka nevojë për Samit që t'i bëjë ftesë Maqedonisë, vetëm se duhet të proklamohet se ajo çështje është tejkaluar", deklaroi Talat Xhaferi, Ministër i Mbrojtjes.
Sipas nënkryetarit të Këshillit Euro-Atlantik Ismet Ramadani, Maqedonia ka përmbushur pjesën më të madhe të reformave në 14 ciklet e plan-veprimit, por akoma mbetet punë për t'u bërë.
"Sa u përket reformave në ushtri, kanë ecur mirë dhe në 14 cikluset që janë punuar në Bruksel në selinë e NATO-s, Maqedonia i ka plotësuar ato kushte. Sa u përket kritereve dhe standardeve që kanë të bëjnë në sfera të tjera të cilat janë shumë komplementare me aktivitetet dhe angazhimet që kanë të bëjnë me anëtarësimin e Maqedonisë në BE, aty ka ende dobësi, ngecje", tha Ismet Ramadani, Këshilli Euro-Atlantik.
Nga ana tjetër shefi i zyrës së NATO-së në Maqedoni, Aleksandar Aleksandrov shprehu nevojën për bashkëpunim dhe solidaritet më të madh mes shteteve të Aleancës, në kohën kur bota ballafaqohet me sfida të shumta në aspektin e mbrojtjes dhe sigurisë.
"Pirateria, terrorizmi, tregtia me njerëz dhe armë, krimi kibernetik, prodhimi i armëve të shkatërrimit në masë, janë sfida në siguri dhe mbrojtje. Fatkeqësisht nuk ka lidhje proporcionale mes uljes së shpenzimeve në mbrojtje, dhe rritjes së sfidave në siguri dhe mbrojtje, prandaj solidariteti mes partnerëve, mbetet një nga kushtet kyçe në progresin tonë të përbashkët", u shpreh Aleksandar Aleksandrov, Shef i zyrës së NATO-s në Maqedoni.
Maqedonia mund të marrë ftesë për anëtarësim në NATO, në mini-Samitin e ardhshëm në korrik, nëse deri atëherë çështje e emrit do të gjejë zgjidhje. Semra Jakupi
