Kreu i komunës Qendër Andrej Zhernovski theksoi sërish se nuk do të ketë projekte të reja nga ' Shkupi 2014' dhe se nuk do të pengoj ato që janë në ndërtim e sipër, përfshirë edhe përmendoret e figurave shqiptare të cilat ende nuk janë bërë pjesë e sheshit. Sipas tij nuk do të rrënohen projektet që janë në ndërtim e sipër, pasi, siç tha ai, nuk dëshiron të paguaj gjoba për projektet e qeverisë.
"Nuk do të filloj asgjë të re nga projekti 'Shkupi 2014' dhe me ardhjen time këtu ndalon ai segment. Ajo që është marr si obligim, unë nuk mendoj ta ndaloj, dhe as të paguaj gjoba pasi, pikërisht për këtë jam kritikuar nga pushteti. Fjalën 'rrënim' që tentojnë ta vendosin në fjalorin tim, unë asnjëherë nuk e kam përdoruar as në fushatë parazgjedhore e as tani në këtë funksion kështu që nuk do të bie pre e provokimeve të tilla. Unë asnjëherë nuk i kam ndarë përmendoret nëse ato shënojnë historinë e popullit maqedonas apo shqiptarëve, por ai është një projekt qeverie. Me ardhjen time nuk do të ketë projekte të reja nga 'Shkupi 2014'", deklaroi Andrej Zhernovski, kryetar i komunës Qendër. Alsat-M
