WASHINGTON - Skandali seksual i presidentit francez Fransua Hollande ka bërë me dhimbje koke edhe stafin e Shtëpisë së Bardhë që po përballet me dilemën se kë duhet të ftojë në darkën me presidentin Obama dhe Zonjën e parë Mishel.
Vetë kreu i Elizesë ka refuzuar të thotë publikisht nëse Valerie Trierweiler vazhdon të jetë de fakto zonja e parë e Francës. Hollande ka deklaruar se do të vendosë brenda 11 shkurtit, në kohë për darkën shtetërore të planifikuar me presidentin amerikan.
Të martën, 59 vjeçari Hollande për herë të parë e gjeti veten përpara medias së mbarë botës pas raportimit në media se kishte një marrëdhënie të fshehtë me aktoren 41-vjeçare Julie Gayet. Kur u pyet nga gazetarët nëse Trierweiler ishte ende Zonjë e parë e Francës, presidenti iu shmang duke thënë se "nuk është as koha dhe as vendi" për të folur për këtë.
Hollande i cili dyshohet se takohej me Gayet në një apartament pak metra larg Elizesë, ka thënë se do të vendosë brenda 11 shkurtit, datë kur është planifikuar edhe darka në Ëashington me çiftin Obama. Për më tepër, duke përdorur fjalë disi të vrazhda për të dyja "gratë e tij", Hollande tha se partnerja presidenciale nuk ka një status zyrtar në Francë.
Por ndërkaq ftesa e dërguar i adresohet presidentit Hollande dhe Valérie Trierweiler'. Por pas skandalit, administrate Obama është në mëdyshje, ndaj siç raporton MailOnline i ka dërguar një kërkesë zyrtare qeverisë franceze. Madje gazeta i ka kërkuar komente edhe ambasadës franceze në Washington, por pa marrë përgjigje.
Ndërkaq Valerie Trierweiler, vijon të jetë në një spital në qendër të Parisit pasi pësoi një lodhje nervore kur mori vesh tradhëtinë e Hollande. Gazetarja e revistës Paris Match, e ka pozicionuar veten si Zonjë e Parë e Francës, duke përfituar një staf të përhershëm, limuzina, avionë privatë dhe shtëpi në të gjithë Francën.
Ndërkaq aktorja Julie Gayet është tashmë në kopertinën e edicionit të fundit të revistës Elle, ku ajo citohet ti ketë thënë një mikeshe më shumë se një vit më parë se kishte gjetur një të dashur më të madh në moshë i cili është në politikë. Ky detaj tregon se mbase lidhja mes tyre ka nisur vetëm disa muaj pasi Hollandë u betua si president i Francës në maj të 2012-ës.
