Elaborimi i ndryshimeve të kodit penal në gjuhën maqedonase nga ana e ministrit të drejtësisë Blerim Bexheti nxiti reagimin e deputetit të PDSH-së Bekim Fazliu, i cili si zakonisht edhe sot në shenjë proteste për mosrespektimin e gjuhës shqipe kërkoi pauzë prej një ore. Paraprakisht ai adresoi një sërë kritikash në adresë të ministrit të drejtësisë por edhe të funksionarëve të tjerë të BDI-së të cilët sipas PDSH-së injorojnë gjuhën shqipe dhe kënaqen duke folur maqedonisht.
"I thash edhe efektet pozitive të këtyre zgjidhjeve ligjore. Dhe jemi të bindur si ministri e drejtësisë sikurse edhe për gjithë ligjet tjera që janë nën ingerencat tona, ashtu edhe këtë ligj do ta përcjellim gjatë zbatimit", u shpreh Blerim Bexheti, ministër i drejtësisë.
"I lus deputetët e BDI-së dhe ministrin që ti vendosin kufjet që të më kuptojnë sepse unë flas shqip. E tani për opinionin dhe shqiptarët. Vazhdon fatkeqësisht injorimi i gjuhës shqipe nga ministrat e BDI-së. E kishim Fatmir Besimin dhe Tahir Hanin që flisnin maqedonisht sot iu bashkëngjit edhe Blerim Bexheti. Dhe fatkeqësisht BDI, jo që do e zyrtarizoj gjuhën shqipe, këtë duhet ta harrojmë por këta edhe aty ku e kanë të drejtën e përdorimit të gjuhës shqipe nuk e përdorin", deklaroi Bekim Fazliu, PDSH.
PDSH-ja në kontinuitet vazhdon të protestoj rreth mospërdorimit zyrtar të gjuhës shqipe, duke kërkuar që zëri i deputetit shqiptarë tek shikuesi të shkoj në gjuhën shqipe dhe jo i dubluar. Nga PDSH madje janë kërcënuar se po që se me seancën plenare do të udhëheq nënkryetar i Kuvendit dhe me këtë rast nuk do të jetë Suzana Saliu, ata do ta bllokojnë foltoren e kuvendit. Që prej asaj kohe me seancat plenare ka kryesuar vetëm kryetari i Kuvendit Trajko Veljanoski. Bedri Rexhallari
