TIRANE- Për të favorizuar furgonët taksi 8+1 në konkurrencë me autobusët, duket se ka bashkëpunuar edhe Policia Rrugore, duke mos lejuar kalimin e autobusëve interurban nga tuneli i Kërrabës. Me pretendimin se autobusët nuk ishin të licencuar për këtë itinerar, inspektorë të caktuar të Policisë Rrugore i detyronin drejtuesit e mjeteve të kalonin nga Qafa e Kërrabës dhe jo nga rruga e re me tunel.
Këtë e ka deklaruar në një intervistë për "A1 Report" përfaqësuesi i Shoqatës së Transportit Ndërqytetas, Kujtim Mema, i cili tha se drejtuesit e autobusëve në disa raste janë përballur me absurditete të tillë.
"Është tentuar që të hapet një linjë e re për në Elbasan nga rruga e re dhe ne që operojmë në këtë linjë prej 15 vitesh, na thanë që ju keni këtë linjë nga Kërraba. Ne e ngritëm faktikisht, fenomeni ndodhi, unë e ngrita aty te kjo konferencë me ministrat që kjo mos të vazhdojë më tej në rrugët e tjera të Shqipërisë. Një x polic rrugor na e bëri këtë tha që juve kshu kshu, plus që ne e morëm vesh që bashkia Elbasan ka kërkuar që të licencojë një operator tjetër. Këtu faktikisht linjat ndërqytetase janë të përcaktuara me udhëzim nga ministria, hapet linja dhe bashkia i licencon. Është tani faktikisht se dikur këto licenca i jepte ministria dhe bashkia Elbasan i bëri kërkesë ministrisë që të hapë këtë linjë të re, se është bërë rruga e re duke mos menduar për ne dy operatorët e tjerë që jemi partnerë dhe operojmë në këtë linjë", tha Mema.
Sipas Memës, shërbimi i transportit interurban gjatë gjithë këtyre viteve përveç konkurrencës së pandershme, është përballur edhe me pengesa burokratike, sidomos nga institucionet e pushtetit vendor.
