Rinia e Partisë Demokratike Shqiptare ka protestuar sot para komunës së Tetovës, duke ironizuar dhe uruar kreun e BDI-së Ali Ahmeti dhe kryesinë e lartë të tij për ditën e gënjeshtrave. Rinia demokratike e akuzoi BDI-në për një mori gënjeshtrash gjatë qeverisjes së tyre. Në konferencën e saj, RDH-ja ka akuzuar edhe kryetar e komunës Teuta Arifi.
"Ali Ahmeti, urime festën e gënjeshtrave. U munduam që në thesarin tuaj plot gënjeshtra të gjejmë atë më të jashtëzakonshmen, më të bukurën, por të gjitha gënjeshtrat i keni për mrekulli prandaj vendosëm që t'ju përgëzojmë për të gjitha. Urim i veçantë i shkon për ndihmës gënjeshtaren, specializanten e gënjeshtrave dhe mashtrimeve, zonjën Teuta Arifi. Zonja Teuta Arifi urime festën edhe pse nuk e kemi të qartë se ku do festoni, në njërën nga 4 banesat në Shkup apo në banesën në Tetovë", u shpreh Valon Izairi, anëtar i RDSH-së.
Kryetarja e Komunës Teuta Arifi reagoi përmes një komunikate, duke thënë se u kishte nxjerrë çokollata e lëngje të rinjve, pavarësisht qëllimit të tyre, të manipuluar, siç theksohej në komunikatë:
"Të vetëdijshëm që gjendemi në fushatë për zgjedhjet presidenciale të vitit 2014 dhe faktit që RDSH është formacion politik, supozuam që ndoshta të rinjtë kishin ardhur të vizitonin kandidatin për president të PDSH, mirëpo ai, edhe pse në orar pune nuk gjendej në vendin e tij të punës".
Nga komuna e Tetovës thanë se do të vazhdojnë të punojnë në interes të qytetarëve, si gjithnjë, ndërkohë që nga RDSH-ja theksuan se do dalin çdo javë me konferenca, për të shpalosur premtimet e pa realizuara të kryetares së komunës Arifi. Bashkim Sulejmani
