Shqiptarët në të gjitha shtetet e Evropës dhe vendet e tjera në diasporë për herë të parë në mënyrë masive po i përgjigjen thirrjes për votim në zgjedhjet parlamentare. Numër i madh mërgimtarësh kanë vërshuar vendvotimet duke krijuar madje radhë të gjata para ambasadave të Maqedonisë në vendet e huaja. Partia më e madhe maqedonase nga paniku i numrit të madh të shqiptarëve që dalin të votojnë në diasporë, tenton të bëjë probleme gjithandej, duke bërë obstruksione e shantazhe të formave të ndryshme. Në disa vendvotime në Evropë shqiptarët janë penguar për të votuar, ndërsa një vendvotim nuk është hapur me kohë, për shkak të mungesës të materialit zgjedhor.
Parregullsi të shumta raportohet të jenë regjistruar edhe në Ambasadën e Maqedonisë në Tiranë, ku votojnë banorët e Pustecit.
"Kemi informacione të sigurta të dokumentuara ku bëhet një keqpërdorim i fotos, blerje e votës ku në një nga lokalet përball ambasadës persona të caktuar dorëzojnë kartat e indentitetit të Shqipërisë në zëvendësim me ato të Maqedonisë dhe për shërbimin e tyre ato shpërblehen me pagesë dhe kjo bëhet nga partitë maqedonase të cilat aty përball qëndrojnë dhe bëjnë pagesën e këtyre", deklaroi Norik Selimi, anëtar komisioni.
Në mëngjes, KSHZ-ja raportonte për dalje të theksuar në disa vendvotime në Evropë.
"Është duke ecur mirë, kemi një fluks më të ngjeshur në Venedik, në Bernë dhe në Vjenë, ku numri i të paraqiturve është 4200 në Bernë, në Veneci 3700 dhe afër 1900 në Vjenë. Edhe pse ka radhë që presin që të votojnë, ne morëm qëndrim që të formojmë nga dy trupe zgjedhore, që të mund të ecë normalisht procesi. Mendoj se dita e sotme në diasporë do të shfrytëzohet që të gjithë ato qytetarë të cilët janë paraqitur, të dalin dhe të votojnë", tha Subhi Jakupi, nënkryetar i KSHZ-së.
Veprimtarët në diasporë bëjnë thirrje që shqiptarët të mos bien pre' e obstruksioneve dhe shantazheve të ndryshme, por të votojnë në mënyrë masive, siç edhe e nisën ditën në orëve të para të mëngjesit. Sot në 36 përfaqësi diplomatike-konsullore të Maqedonisë për votim në zgjedhjet e parakohshme parlamentare janë paraqitur 23.782 shtetas të Maqedonisë të cilët punojnë ose jetojnë në vendet e huaja. Sipas KSHZ-së, më së shumti të paraqitur për votim ka në Njësinë Zgjedhore 7 që përfshin Evropën dhe Afrikën - 18.911. Në Njësinë Zgjedhore duhet të votojnë 3.337 shtetas të Maqedonisë. Kjo njësi zgjedhore i përfshin Amerikën Veriore dhe Amerikën Jugore. Në Njësinë Zgjedhore 9 janë paraqitur për të votuar 1.534 shtetas të Maqedonisë. Benjamin Arifi
