TIRANE - Në fund të vitit 2015 borxhi publik ka prekur shifrën rekord prej 72.2% të produktit të brendshëm bruto. Sipas të dhënave zyrtare të Ministrisë së Financave, krahasuar me vitin 2014, huaja qeveritare është rritur me 6.66%.
Borxhi i jashtëm përfaqëson 47.1% të stokut të borxhit të Qeverisë Qendrore ose 33.97% të PBB. Në krahasim me fundin e vitit 2014 stoku i borxhit të jashtëm është rritur me 78.4 miliardë lekë, ose 19%.
Kjo rritje vjen kryesisht si rezultat i shtesës së borxhit në stok me 73.5 miliardë lekë, ndërsa zhvlerësimi i lekut kundrejt monedhave përbërëse të stokut (me përjashtim të EUR), e ka rritur stokun me 4.9 miliardë lekë.
Sipas afatit të maturimit, 57 % e stokut të borxhit të brendshëm të Qeverisë është borxh afatgjatë, kundrejt 51.6% në fund të vitit 2014.
Treguesi i ditëve mesatare në maturim arriti në 706 ditë, vlera më e lartë historike, kundrejt 630 ditë në fund të vitit 2014, si rezultat i fokusimit të huamarrjes në instrumentet afatgjatë.
Banka e Shqipërisë mban 9.91% të portofolit kundrejt 11.26% në vitin 2014. Sektori bankar mban 58.2% të borxhit kundrejt 61.53% në vitin 2014. Institucionet jo bankare mbajnë 17.1% të stokut, ndërsa individët mbajnë 14.8% të stokut te borxhit të brendshëm.
