E pasigurt në çdo metër të saj mund të konsiderohet autostrada Thumanë - Milot. Edhe pse është zgjeruar me 4 korsi, ajo ka mbetur e njëjta rrugë e vdekjes e disa viteve më parë.
Ashtu si atëherë, makinat futen nga të gjitha anët, si të ishte rruge fshati dhe jo një autostradë, e cila duhej të ishte e mbyllur në të dy krahët e saj, e izoluar me mbrojtëse metalike.
Por edhe pse një prej rrugëve me trafikun më të lartë, edhe pse një prej akseve me numrin më të lartë të aksidenteve, Autoriteti Rrugor Shqiptar e ka injoruar rrezikun, duke toleruar një situatë të tillë.
Në të dy anët e autostradës mund të futen vend e pavend njerëz e makina që u presin rrugën mjeteve që qarkullojnë me shpejtësi, pasi barrierat anësore mungojnë në të gjithë gjatësinë e autostradës.
Në çdo autostradë, hyrje - daljet janë vetëm ato të përcaktuara nga autoritetet dhe jo siç ndodh në aksin Thumanë - Milot, ku për to vendos kush të mundet.
Ka me dhjetëra hyrje ? dalje të paligjshme në këtë autostradë, por autoritetet që e kanë detyrim ligjor sigurinë në rrugë nuk ndërhyjnë, duke u bërë kështu bashkëfajtorë të aksidenteve me vdekje, ashtu si në rastin e atij të ndodhur mesditën e të martës, ku humbi jetën mesuesja 48 ? vjeçare, Afërdita Kurti.
Por edhe sa jetë njerëzish duhet të marrë kjo rrugë që autoritetet të marrin masa për të garantuar sigurinë e saj dhe të qytetarëve që lëvizin në këtë aks?
Edhe sa aksidente duhet të shkaktohen si pasojë e lënies së kësaj rruge pa standarde?
Siç ndodh rëndom në Shqipëri, institucionet përgjegjëse vihen në lëvizje sa herë ndodhin fatalitete, por edhe atëherë, vetëm për të mbytur zhurmën që krijojnë të tilla ngjarje dhe jo për të përfunduar projektet ashtu siç duhet.
Tv Klan
